朋友仔，Please Keep Praying for me

今日又再次感受到神的預備啦……

今晚返到屋企收到庫房叫我考試的信件，嘩！又有一個機會啦！雖然要過埋考試先可以interview，不過，起碼又有一個機會o麻…係未？！

真係好開心呀！！神讓我好滿足，亦讓我好溫暖呀！！

Cookies

我的檯上有出現大量的曲奇餅餅，好驚呀！食極都有，食極都未食完！！雖然好鐘意食，但係咁食法，真係有d驚！可唔可以唔好再買同一款牌子和同一款味道的曲奇餅餅呢？！

你千其唔好隨便話俾人知你好鐘意食某一種食物，唔係就會好似我咁……食極都有！！

睇怕今次都應該食到農曆新年啦！！

打邊爐

我好鐘意打邊爐，今日BB中級組祝誕，佢地的慶祝活動就係打邊爐呀！我好開心呀！除左巴巴燒，打崩爐都係我至愛！！

今日都好滿足呀…由下午四點半到晚上九點呀！食得好飽飽…食左好多蝦呀！d隊員一定係平日無跟阿媽去買野，買成七十蚊蝦！？食到傻…好彩…陳素茵幫我將d蝦脫殼……哈哈！太好了！但係真係飽死啦！

食得好開心，不過，到最後又係無人肯洗碗，又係我洗！唔制呀……有無搞錯呀！！

我的死穴

又被人講我的死穴…幼稚！搞到我由晚喊到朝…好唔開心！你明知我被人咁話我一定喊到收唔到聲，點知你仲要鬧番我轉頭！明明係你唔岩，點解仲要話係我錯喎！有無搞錯呀！衰人呀！！

Please Pray for me

我好開心！簡直係十個開心！因為今晚返到屋企收到一封信，係audit department叫我下個月中interview呀！我好開心，但又好緊張呀！因為咁大個女都只係見過四次工，不過……都已經係十一年多前的事啦！！

朋友仔，希望你地可以為我禱告！

===========================================

天父爸爸，多謝你！是你聽禱告、是你給我一個機會，我真係好開心呀！我深信你的帶領，求你繼續保守女兒呀！天父爸爸， 多謝你！！

討厭的一天

這排好多人問我係唔係唔開心，因為見我好少寫blog，又好少MSN，更少係通電話。其實都唔係呀！不過，今天又真係有少少失落，應該係話我有少少失望。

公司的人成日都係度講人是非，我真係覺得好討厭！

好耐都無見過chris唔開心，但今日俾我個舊partner激親，搞到面紅耳熱！見到我都唔知點講好，個癲婆調左過隔離條team後，真係變本加厲左好多！成日都真係以為自己係大家姐，我對佢……唉！可免則免…其實chris都係咁樣，不過，今日有隻case趕住，所以逼於無奈同佢溝通，唉……點知俾個癲的寸左chris一輪！！

死人肥輝成日掛住擦鞋上位，今日又係度係咁同白頭叔叔話你是非，你講咪講囉，講完又要轉身問我……唔答你都仲係度係咁講，唉…好討厭的人！

我同好友係度email，肥輝竟然行過我位，企左係度係咁睇……喂！你有無禮貌架！我鬧你都好正常呀！點解你仲要惡人先告狀呀！

好討厭呀！！

神為我預備

好開心！神的供應足夠，神又為我預備了！

葛福臨佈道會

你有無出席呢？我呀…由於基督少年軍負責維持秩序，加上希望d隊員參與，所以都有去呀！不過，好呀！簡直係十個呀！

我的分隊要負責東院道，即係我要企街呀……就係咁我又曬黑左好多，仲要曬到塊面又紅又痛又癢……要狂敷mask、狂補濕……

因為好多好多人，你知啦！我有人群恐懼症，所以有好多時候我都真係驚到腳軟同心跳頭暈！！不過感恩，神卻加添我力量！！哈利路亞！！

初時係大球場，人多坐滿後又過左南華會，最後十分鐘內再經連道上山下山過埋去跑馬地馬場……我都覺得自己好勁呀！不過，得著的係我瘦左呀！哈…條裙真係鬆左呀！司徒sir同王sir都明顯瘦左！哈…雖然辛苦，但可達致免費的減肥效果喎！！哈哈！！

仲有好多好開心的事，有好多出席的人會走來同你講︰"辛苦你地呀！"聽到真係好開心呀！仲有仲有，好多小朋友走時同我講︰"拜拜姐姐，你認唔認得我呀！你頭先抱我落車呀！" 哈…我係東院道初時負責旅遊巴落車，我抱左n咁多個小朋友，點記得佢呢！不過，聽到好開心，因為小小年紀的小朋友卻記住我！！

基督少年軍預備了好多好多食物，除了午飯、晚飯外，還有好多小食，有雞翼、雞脾、熱狗等等……我分隊的隊員，真係好似從來無食過野咁，唉！真失禮……鍾倩嫣竟然可以食左成三隻大雞脾、熱狗、三文治，係一口氣食左咁多！勁呀！完全係我食幾餐的份量，但佢竟然可以一餐就搞點左！其他的都起碼兩隻雞脾，又或七至八隻雞翼……少年人真係強呀！

整個佈道會中我雖然真係好好辛苦，但開心的卻是數不完！最起碼的是我企係街的時候，看見起碼四萬人係大球場，同一萬多人係南華會進入或出來時，我的人群恐懼症無叫我完全暈到，這真的是我最開心和感恩的事了！深深覺得我的付出，神已經大大加許獎勵給我了！