悶

好耐都無寫blog，好多人都問我係唔係又唔開心呢？噢！我諗我係好悶好悶咋……返工好悶，放工後都係好悶！好悶好悶呀！

公司好悶，係因為水尾，無咩野做，日日都係度……坐。咁o既日子，以前會好開心，因為係可以溫習的時候。但係，依家又無讀書、又無試要考，所以……都唔知做咩好？！

其實，我都有唔開心！公司傳我的事都越傳越多，咁係我最唔鐘意的事。佢地越傳，我就更加唔想到人講野，費時講多錯多。

已經好多人日日都走o黎問我係唔係真，就連陳強都話不如就將佢變成真啦！！呀……咁都得？？

============================================

早幾日同老鄭傾左好多自己的事，我知道自己背了好多包袱。但係我真係想左好耐好多，我發現我真係好難將佢地放下。老鄭同我傾的，其實都係大家一路都同我講過的事。我知道大家對我的關心，我明白大家都好擔心我。我都真係不得不承認我真係好辛苦，但係……

點解我病咁耐

都病左成個星期，但係今日都仲未好番。把聲就開番，但係今日d血糖就低得好更要，今日成日都係暈舵舵，好辛苦呀！

搞到今晚學琴時都彈得唔好，又被阿sir話添！好彩，佢今晚都體諒我，唔係就麻煩啦！

唉……我究竟幾時可以身體強壯d呢？！

又開盤啦！

為左鼓勵 felix返工，大家每個星期都開出不同的盤口。上星期我就輸左全場的茶，今日又有人輸左每個價值$13的生果盒。

今日阿強自己開盤添…佢話如果佢由16/4至30/4可以返到十日工的話，我地七個人就每日就請食生果盒，如果佢輸左就請我地七人去福臨門食lunch！嘩！福臨門呀…有人話一籠點心要成$50…炒一碟飯都要成$100…嘩！好開心呀！因為阿強輸的機會率達百分之九十九啦……哈！

今次一共有七個人參與，大家聽見佢自己開的盤口，想都唔想就應承左啦！！嘩…好期待福臨門的午餐呀……

大家都病左啦

好快又放完五天的長假期，不過…一返工又病左！又發燒又流鼻水又喉嚨痛又頭痛…好慘呀！仲要係我同我主子阿余生一齊都係病左！大家o既病徵都係一樣添！

不過，我地今日都覺得好快會好番，因為我地好似已經成功咁傳左俾阿強啦！我今日放工時佢話佢已經又頭痛又喉嚨痛啦……哈！

感恩的一天

今日又落雨又凍，真係好唔想返工。不過，為了我同felix的打賭，今日點都要返。

上星期同felix講過，如果佢今個星期返足工的話，我就請全場飲茶。其實佢星期一已經break左，因為佢只係返左半日工，但見佢都係因為病先咁樣，我就同佢改左d rules。如果佢每日都俾我係公司見過佢一面，我都當佢返左工。就係咁樣，我今日就輸左了。但又好彩，好多人放左假，所以請全場都只係44杯茶咋……多謝盛惠$154。嘩…好耐都無試過請全場啦！阿強，我為左你就輸左咁多啦！你要努力d呀！

你話你知道我地每個不斷咁跟你打賭你返唔返到工，係想push你努力d返多d工。對呀！真係希望你身體健康！我覺得你已經好努力，但希望你可以再努力d，記住記住，唔好俾咁多壓力自己呀。繼續為你好好禱告！

今日又同余生吵足一日，我同你的八字係唔係真係相呢？！點解我地兩個好似每日都會吵一次？？對面個癲婆問你野，你唔鐘意咪同佢講囉，點解又要對住我發脾氣呢？我好似無做錯事喎…又好似我話我要跟felix，我都好似係講笑，點解你又要咁認真o架！？

好彩旁邊都有好多人看不過眼幫我講，否則……(難以想像開戰後的情境)
又好彩felix返左工，可以幫下我！所以話呢……阿強你好重要，因為只有你會幫我咋！

不過，點都係感恩o既…因為感恩felix可以返到工、感恩今日有人幫我啦！

仲有，今晚仲要繼續感恩……感恩我又可以順利完成兒童故事的錄音！又感恩食左一餐好飽飽的歡送大頭哥晚餐。

天父爸爸，好耐都無同你講︰"多謝你！我愛你呀！"