Busy Weeks

這幾個星期係公司忙得要死，以前忙極都無今次咁慘！放工都好似偷走咁，唔知點解？！到左復活節以為可以休息下，不過都好忙，其實這幾個星期都好似無休息過咁……十分攰！死得啦！

=========================================

22/4原本團契大旅行，又原本係去陽明山莊，不過…最後都係去左…教會三樓平台BBQ！由於太攰，全程都只係燒左兩次，我成日都食其他人燒的食物…都好似有d賴添…不過，我真係好攰！

23/4返完崇拜去左飲茶，原本又諗住食完返屋企訓陣先，不過又抗拒唔到行街街，所以又同左hullian同阿牛去銅鑼灣shopping，雖然買唔到野，不過好開心！因為近來太忙，好耐都無行過街啦！晚上又約左mig同R sun，點解你地次次都遲架！

24/4今日約左哲亮，好耐無見啦！大個仔左好多好多，成個年青人咁o既樣了！好彩有佢，今日我唔使湊蕭仲延，哈哈…真係太攰，好唔想幫人湊仔了！嘻嘻…

=========================================

放完四日好似無放過的假後，變態的工作生活又開始，又係好忙碌的一個星期……做做做，係咁係度做…

又聽到老細這陣子成日同我講的話，就係︰"唔趕架！慢慢做，不過做快d啦！"

唉…我絕對有理由相信這句子已經犯了語病啦…哈！

=========================================

30/3去左好友屋企巴巴燒，好開心呀！因為有得燒野食，但又係果句…太攰了，所以無咩mood！不過大家都好似一樣好攰咁…下午先開始燒，但夜晚未夠八點就走人啦！

我又搭順風車回家，不過架車開左無耐我就訓左。好眼訓呀！

====================================

31/3 往時的今日，一定係發定的躲懶日，因為今日基本上係無電腦用，無野可以update，但我都仲係要努力趕工…唉！真係好似有d　…都係唔好講啦…

=========================================

返多幾日工又有三日假期，希望我今次真係可以好好休息下啦！

假期開始啦

四日的復活節假又開始啦…嘩！正！因為屋企又無人，得番我一個，今次返轉間屋都得啦…哈哈！

今日都唔知仲咩鬼，晨咁早就醒左…於是乎落街買野煲湯，再整曲奇餅餅，係香橙檸檬脆脆曲奇餅，好好味呀！真架…下午見到betty都有俾d佢食，佢同歷蘇都話好好味架…哈哈！一定好味過兒童崇拜整果d…嘻嘻！

下午就去左cheryl屋企，BB Travis又肥左呀…婆婆度一定係好食好住呀！佢隻腳仔仲肥過我隻手呢！

今晚就去左九龍城食飯，因為joanne生日飯，今晚食潮洲打冷，都好味呀！而且都好平好抵食呀！之後，當然係必去合記食糖水啦！我喜愛的綠豆馬蹄沙清心丸，正！

完了

真正一個答案，原來對我真係好重要。這個星期工作已經好忙好攰，不過心情更攰。大家從未可以鼓起勇氣去面對，可能係我逼得太緊了，你終於都說了…

男人失蹤可能真係有古怪，直覺我知道有事要發生。今日又終於被甘美姐說了一件事我知，你是好心說，但其實我一早就知道了，謝謝你！

就係囉…揀好咪好囉！唔好拖拖拉拉，我真係唔鐘意咁樣。一年多了，真正的畫上了句號。

反而咁樣，我無喊過，好奇怪，但我反而好驚！因為我怕我之後會更加唔開心…

每日靈修

經節：
你們要嘗嘗主恩的滋味，便知道祂是美善；投靠祂的人有福了！(詩篇三十四篇8節)

通常你不容易在困難的情況下，做得恰如其分，結果圓滿。即使你禱告，也不如預期的那麼釋放。這時你會期盼主給你明確的應許。從聖經上你找來找去，似乎也沒有一個應許合乎你用。你不死心，再三尋求，終於如願以償，找到你所需要的應許。此刻你才知道，神的應許是針對某一特殊情況發出的，正如你必須持正確的鑰匙，才能插入相符的鎖孔。一旦找到永生神所給的應許，你就趕快呈在主前，說：「主啊，這是你美善的應許，求你讓它早日實現。」
重要的是結局，因為禱告得蒙垂聽，憂愁就化為喜樂。　　　　─司布真

只要單單仰望上帝，這應許必使你看見大信心；惡者說「不可能」，你且不要聽信，大聲說：「我只相信必然成就！」

不用灰心，試試你所有的鑰匙，神絕不會故意把寶庫鎖住，不讓我們進去。

攰死

這個多星期裡我都真係無好好休息過……簡直係……攰！

又要做ad hoc，有無咁多野做呀！又有無理由要我一個做晒呀！？好慘！你叫我要忍耐，因為這是考驗的時候，但要咁趕…我真係好攰！幾百張單，都係我一個人做晒……一個字……死！

幾晚都要OT，每日十多個鐘不停係度計，真係所有精力都俾晒公司！放工又要去教琴，真係好眼訓呀！

死到今晚都未死完，希望明天真係可以搞點晒佢了！

===============================================

星期六都唔係好想返教會，因為我真係好想訓覺，當然…最後都返左，因為BB要開會呀！不過，都可以叫好彩返左，因為enoch又係澳洲返左來，好耐無見啦！

開完會都會同一班阿sir去食飯，星期六晚都唔例外，我都好開心，因為有酒飲呀！都戒左酒好耐了，不過，今晚都只係飲左兩杯啤酒，都唔係好多咋…嘻！溫sir仲話，不如復活節camp帶枝紅酒去，嘩…好呀！嘻…

================================================

星期日兒童崇拜，我絕對要向神感恩了！從未試過未練過就做司琴，因為stella ee之前俾唔到琴譜我，所以到星期日朝先可以練下幾個字咁！好驚呀！不過，真係要說哈利路亞！因為有份譜係我最唔慣睇的數字譜，不過完全可以彈好了…哈哈！多謝天父爸爸呀！

I'm OK ga !

多謝你地呀！我這兩日好好多了，同betty傾左好耐，我真係明白了！知道我地兩個的相處方式各有不同，又知道忍耐了咁耐，我只有繼續忍耐，如果我選擇繼續等待的話。

有時都覺得好無用，因為話唔等但又繼續等。好似可以獨立番幾日，但一個電話或SMS或email後，我又繼續好以之前一樣。為咩呢？都唔知，為一個朋友，還是真係想為一個伴呢？都係一樣唔知！

以前好怕好怕承諾，因為我覺得係一個包袱，但這一年我知道我改變左…又或是神覺得這是時候要我去改變了！我真係咁覺得，我好覺得這陣子的經歷在當中有受傷，但亦同時深深感受到神在當中讓我學習和他的教導。學習去愛，學習去承受……我深信一定有得著，不過這刻真係好痛！

從來都好在意別人如何看待我自己，所以任何人對我有任何不同了的動作/思想/眼神…我都會好緊張，可能係咁成日都困擾了我自己。我想這都仍是我要去學習的。

其實，收到審計署的信後，我好失望…因為我曾經氣言地講我唔會轉到工，結果…又真係如我所言。唉…其實點樣也好，我都好想走o架！因為這公司畢竟做左咁多年，真係好悶了…好想轉換下環境。我要努力…希望快d又會有其他department請人，等我又可以申請呀！不過，走…一定唔係因為你！

==========================================

To: Carmen

好呀！飲番杯呀…哈！放心，這兩天真係好多了！星期六下午呀…因為夜晚BB開會！除非你等我呀！

Wow

好唔想食中午飯，但星期五都無奈地食過！你又要食，出到來又對我不揪不睬，點解呢？四個人食飯，但我好似搭枱咁！要放，但又放不開了！問我想點，不如你想好過！審計署終於都知道result，又係衰左，都其實預左啦！不過，你只當又係我錯囉！唔通我離開這公司真係咁重要麼？！

…就係咁又失蹤了兩日，你唔通咁叫做有禮貌嗎？我，就要立刻回覆，不過，你好似唔會，仲會覺得煩！但我話你知，我仲煩呀！

胡思亂想了幾日，就算唱埋K，不過都好似還未發洩到…忍唔住打俾Betty喊左一陣！呀……

不過，星期一同今日你又可以當無事發過…其實…你究竟想點呢？！

唱唱唱

今日做完司事，食過早餐後就同Isabella、Nicole同Jaclyn去左唱K！唱呀唱…由下午兩點唱到夜晚八點，仲要四個人係間好大o既party房，嘩！正呀！四個人、四枝咪，不用爭…哈哈…加洲紅的red box plus真係好抵…每人盛惠$91！Good…