無無聊聊的一個星期

今個禮拜都算無無聊聊的一個星期，星期三同四要去上左個好無聊的powerpoint電腦堂兩天，本應好開心，因為唔使返工做野，而且一齊去上堂的人中都有好多我識的人，咁都好呀…不過教o既野全部都係我識，所以好悶…好悶…悶到訓著左！好難頂！

上完兩日堂，結論係返工好過啦！返工雖然好忙，但原來忙都好過悶到訓著左囉！

雖然苦悶，不過星期四都好開心，因為未夠五點鐘就落堂，可以走人啦！正…都唔知幾耐無試過了，好開心！dickson仲叫我陪佢一齊返公司繼續做野，佢都真係傻左囉！痴左線！咁早放工做咩好呢…當然又係行街！好正呀！一個人行左陣，夜晚就約左jacyln同ming去左又一城，估唔到阿ming買衫會諗咁多，又或者咁講，我買野都唔會諗咁多野，鐘意就得啦！鐘意就可以買架啦！點解佢要思前想後咁呢？！費解…

星期六就好開心咁返BB，之後就去左行街睇戲食飯，好耐都無試過係一個晚上一口氣做左咁多野！哈…而且都幾好，終於係我行街時買唔到野，或者咁講，係因為要陪r sun買衫，所以都無去睇過女裝囉！都好都好，咁又可以慳番d，因為這兩個月都真係用左好多錢啦！都係陪r sun買衫開心d，因為佢好似我咁，買野唔會諗，哈…基本上我話好睇的佢都會買囉！哈哈！！睇左赤壁II，都幾好睇呀！張震好型呀！好靚仔呀…哈哈！雖然都成兩個幾鐘，不過劇情緊湊，都唔覺睇左咁耐呀！！

星期日，即係今日，就好努力咁清理自己屋企，抹呀抹呀…間屋好乾淨了！

返多幾日工就放假啦！仲有幾天就出發去旅行了，就快就係牛年了，唔知新的一年又會點呢？！會係開心還是會傷心呢？對於今個新年，我有好多願望同盼望，唔知今年又會唔會可以實現呢？雖然個人開心番，不過唔知點解唔咁再去向神祈求什麼！點都好…新的一年又係新的開始了！