一星期又過去了

終於努力左一個星期，真係辛苦！原來做objection真係唔好做，我日日都俾個WMS玩，這都唔知係咩system，click來click去…但都過唔到個版面…死得！只係學用佢去出信都玩左兩天先叫做smooth d…再落去…

我上星期仲問點解我會有兩個in tray咁多，原來係…兩個都唔夠用。計埋我個AO俾我的in tray，我一共有三個in，但真係…超級唔夠用！！今晚放工時望下前面，個in tray仲高過我坐係到…我已經望不到前面的地方了！日日都好努力，但這又話趕、那又話趕…你話我做得d咩？好彩係這幾日都只係一日見得一隻caller咁多，如果唔係…個tray應該已經…(不敢想像)

日日放工都諗下明天應該要做d咩先，不過到依家為止，我都未能做到。一返工，又會有突如其來的事話要做先。手得一對，真係唔知點好。

但唯一係好的就是這組的人都俾K的好，個個人都好友善，以前係K時都會覺得B的人超級咁寸，但這星期相處下來又幾好！！或者係太忙，我都無理會到佢地講緊咩做緊咩！！但真係好感恩係個partner同個AO都好好好…好人！個partner仲要係一個完全無脾氣的人，真係超級好人，我都超級感恩天父爸爸給我這安排了！

開工啦

今日終於要開工了，由早做到晚，做到成七點幾，好攰呀！！又唔識做，又唔知要點做…就連出封信都麻煩過人，又要update這update那…好煩呀！以前做assessing都唔使咁，真係好麻煩呀！

我的第三天

我一早起身好深信今日都應該有電腦用啦…點知…好笑的事又來啦！

等等等…等到成十點鐘，computer section call我話去16樓get password，嗯…大家都好開心，因為我有機用，咁大家就可以俾番d野我做，而且我個A.O.都可以有番d野做了…點知…這真係政府囉，俾我workstation的password，但係login window的password就未有，因為佢地話係另一條team負責…呀…有無搞錯！大家都話俾左兩個房的key我，但間屋個大門鎖匙呢…你等下啦！痴線架！有無搞錯？？！！結果…繼續坐！！anthony同馬太話你就只有這幾天的權利可以咁，好好享受吧！唉…我都知，但齋坐真係好悶呀！

最後，阿assr出面，到下午成二點半都終於連window的password都俾番我囉…但…又話我個internet mail仲未可以用，因為internet係另一條team負責！你話呀…有無搞錯呀？要一堆passowrd，竟然有三條team負責！超離奇囉！！！！

諗住…好啦…最多唔覆caller的email，無所謂，都唔差個一日半日，但……係其中一個workstation到又找不到我的worklist，你知唔知點解呀？(你根據上面咁講，一定會估到了！)yes...bingo....要另一條team幫我match番我的info先可以俾到個worklist我，所以呢…繼續坐！真係好想同computer section講....."xyz#%*%&...." 真係想死了！

computer話我係星期一先可以真正完全用番晒所有野，即係星期一就要開始努力工作，因為這個星期的所有inwards都未清過…慘！個 In tray已經堆到好似個山咁高了！！

我的第二天

今日仍舊係得個坐字…簡直係悶到爆…

今日係andrew坐counter，佢真係好人都無人有囉…俾隻caller我見，講真…唔介意見，但我仲未有password呀o麻，你話我點見好呀？！搞到我要anthony陪我去見…搞到我好唔好意思，因為由早上11:30見到12:30，再由1:45見到3:00，真係超唔好意思呀！又有感恩係個caller意然肯去食個飯先再返來，好彩係咁，唔係我諗我今日都無飯食囉！！

唔知係唔係天父爸爸見我悶，所以俾隻咁o既caller我見…見完一日，成個人都傻左…都唔係未見過caller，但未試過見咁耐…個個都話因為依家個位唔同左，要見objection，都係麻煩d…唉！真係慘囉…我講我呀！

我的第一天

今天的心情…嗯…我諗好似d小朋友第一天返學咁緊張！返到公司…嗯…我諗我d同事就好似d父母第一天見到自己個小朋友返學咁開心！yes…我覺得係咁！

返到公司，諗住放低個袋先上去報到，點知各親愛的同事就係笑得好開心咁同我講早晨！！忽然間覺得d同事變得可愛左！上到去PR時，d同事仲可愛…俾我影左三張職員證的相，影完唔好又俾我再影過…真係好！這刻又令我記起我換智能身分證時都係一樣影左三張相！個個都話新的職員證影得好好…yeah…太好了！唔係第時見人時就會好醜怪了…哈哈！

返到26樓，入門後就要轉右了…習慣左轉左十三年，估唔到今天起就要轉方向了！當刻轉右時…感覺好得意…嘻！大老細同我講左一件事，我要好感恩，因為這消息令我好開心、好感恩。係…真係好感恩！件事係咩？唔講得住…大老細話要暫時keep scret！！

坐低自己個位，真正的好開心…因為這刻我終於知道我真係升左做AA了！這刻的感受係最真實的！而且，各親朋好友不停咁走來探我…哈哈…個人都定d，因為新的環境始終唔習慣，而且第一天，著住套suit…好唔自左！

開心左一陣，就想訓覺了…因為未有電腦用住，未有password…超悶…齋坐到放工。你知啦，坐係大老細房門口，始終都唔可以真係齋坐，睇住本file呢…又唔知點做，而且無機check野，所以坐到眼水都流埋！哈哈…哈哈…

最後1天

今日終於都係最後一天係K組，感受好深，好唔捨得！今日成日都過左去B組handover，唉…好驚呀！講真，作為一個新人，真係好驚好驚！要努力去禱告，我好需要平安！

handover完，就返自己組同大老細say goodbye了…希望好似佢咁講，我會好快返入去做1,6，1,6村點都好過我依家做2,3村呀！又係要努力禱告啦！

到左5點，我開始將係table上的物品放入箱內，一路收拾一路好感觸，白頭叔叔就更感觸過我！大家都好唔捨得…

最後走左去同TO say goodbye，大家傾左好耐，好唔捨得呀！其實大家都係同一層樓，但就搞到我好似要離開去第二層樓咁！哈哈…咁又傾到成七點鐘，當我準備走人時，肥仔仲問我係唔係唔捨得所以咁夜都唔走，嗯…嗯…都係架！

明天就係B組o既人，希望一切都好啦！天父爸爸，多謝你聽禱告，多謝你為我開路、為我預備，求你可以繼續保守孩子呀！我愛你呀！！

最後2天

由最後14天開始數，原來已經好快就要倒數完了。好唔捨得…真係有d感慨…今日個人真係好唔捨得。一路收拾，一路好唔捨得…咁快就到20號了！明天係我最後係K組的一天，十三年就係咁過左去了，o黎近的4年就要係B組渡過了…將來的日子會係點呢？？

今日到我要handover俾下手了，嗯…感覺又係怪怪咁。成日好想離開這地方，但到了這天又唔捨得放手咁…點解我成日做事/做人都係咁呢？！其實，今日大家都睇得出，白頭叔叔都好唔捨得我呀…當然了…我咁fit…哈哈！叔叔今日都好唔開心咁！唉…

Grace今日送左我一條好靚的項鍊，真係好靚呀！佢真係好人了…嘻！係周生生出品，都唔平架！真開心…所以我應承佢我星期三會帶住佢返工！新的一天、新的開始，所以這天都要帶條新的項鍊…yeah！！拍檔左咁耐，佢真係客氣了！

明天，真係最後一天了…大家今日都問我有咩感受？嗯…就係唔捨得囉！時間真係好快，十三年前去K組的情境我仲記得好清楚，估唔到就係咁快就過左十三年了…

今晚收工帶左個staff badge返屋企，好好咁影番個copy，明天就收番我個badge了！星期三要再影過相、要換過一個新的badge了！！

明天真係最後一天了，最後係K組的一天。所有事都有完結的時候，明天就係完結之時了。

最後3天

雖然琴晚睇完演唱會好夜，但今日一早就起身啦…因為SSS要彈琴呀！Ada揀左兩首好易彈o既歌，就係讚美之泉同足印。區寶文今日預備左一套電影分享，但唔知點解部腦出唔聲，你估點好呢？…嘻…就係由alfred同區寶文一同配音…超搞笑！！笑到肚痛…

下午返到屋企就好好咁清理一堆衫，嘩…又俾我送走左好多好多…哈哈…又有藉口可以買番d新了！好野…

最後4天

真係快…仲有四天咁多！今晚去在睇"好多謝安琪吶喊演唱會"，都幾好呀！好的係我地的坐位，好寬敞，可以伸直對腳…yeah！成晚最high的時候，我諗一定係汪阿姐出場啦…high到爆！！不過，成8:50先叫開場，好似有d離譜了！

最後5天

今日好忙呀…仲要係俾嚇親添…今日一早就過左去handover，結論係想問下，有無得俾條繩我自己hang左自己好過！睇見這位退休人士留番咁多"蘇州晤晤"俾我…唉…真想死！雖然大家都話anthony會睇住我，但點睇呢？！唉…

雖然白頭叔叔叫我唔好驚，但見到佢搞到咁杰…又點可以唔驚呢？我諗真係要過返娘家求教了…

上午聽完一朝，又俾d files嚇左一朝以後…我好暈呀！真…成個人好腳步浮浮咁…唉！下午就到我好努力咁清野，因為下星期一就到我要handover俾我下手了。好快咁…咁快就到20/5…嘩！

日子越來越近了…

最後6天

今日又放假，真正的今年度最後一天的大假，放埋今日就無了！其實我好攰好攰…因為真係好多晚都訓得唔好了！

最後7天

今日各人都一定好開心，因為有飯食，仲要去YMCA食buffet，但我都好耐無試過簽卡簽到咁大銀碼囉！今日我就當然要坐老細台了，食得真係有點不自然，五大老細圍住我坐…呀…


黃太今日超high，我睇得出佢戥我好開心，哈哈…仲話如果我過到去B組俾人蝦，佢會班馬過去打救我喎…嘻嘻！！


臨放工時終於過左去同assessor同埋SA打招呼，希望一切都好了，都好多謝我一個舊老細，因為佢同我個assessor好熟，替我打左個招呼，知道後個心好似定左d，或者真係要好似牛公咁講…平常心！


你地快d睇下啦…係我依家組的同事送給我架！

o黎盒係劉太送俾我的曲奇餅餅…yeah…係赤柱果間的出品呀！

Swarovski的mickey mouse, 同事話係60週年版呀！嘻…

仲有一條都係Swarovski出品的頸鏈呀…都好閃呀！

阿發送俾我的哈哈笑…個哈哈笑可以轉架！

最後8天

今日好好咁休息左一整天，因為今日放假呀！正…訓到夠了！

最後9天

由於今日要請茶餅，搞到個人好tired添！真係好煩，點解我走要請咁多餐，諗極都唔明！一餐茶餅、一餐buffet，竟然係有個她同我講番野！？好奇怪…這世界真係咩人都有！不過她無端端的說話讓我記起，我曾向神禱告要離開，還記得去OR見工時carmen叫我要努力禱告希望可以離開這地方，希望離開這個她，我仲好清楚咁記得carmen同我講，禱告離開才是我的出路！說話仍在耳邊咁，但原來真係禱告答允，我真係可以離開了。今日的情境只係讓我記起當天的說話，對…出路已經出現了…一切都要重新開始，想到這，我又發覺自己好似唔需要咁驚新的環境。牛公今日上午同我講，平常心看待就好了。唉…平常心？這刻好似無左。

今個月的日曆上寫著︰"你當剛強壯膽！不要懼怕，也不要驚惶；因為你無論往哪裡去，耶和華你的上帝必與你同在。(書一︰9)"

最後10天

嘩！咁快就剩番十天，日子真係越來越快…光陰真係快過支箭！今日係母親節，不過我覺得個市好靜，一d都唔似係母親節。今日同daddy mammy去左CWB，星期日條街都算少人，特別係Sogo，好鬼靜，唔算多人！市道真係差咁呀！

明天又返工，後日又放假，再後日又返工，再後後日又放假…哇哈哈！今個禮拜的planning係咁，因為最後可以放假的日子了！要珍惜…估唔到可以放大假都要珍惜呀！

琴晚終於都叫做訓到d，因為琴晚飲左d酒，嗯…應該都唔係飲左d，因為訓落床時覺得個人wing wing地咁…唉！想訓覺，竟然要自隊！

最後11天

唔使返工的日子才是我真正可以輕鬆一點的時候，壓力係我從未遇到咁大！因為正如黃太所講，我要背負的實左真係好大好大…

今日為左relax，我選擇了家會而唔返BB，而且晚上同兩位摰愛親朋一同晚膳，同朋友講左自己的壓力，感覺好似好d！其實，我好想喊一餐，因為我相信咁樣先可以發洩到。

Jaclyn真係好，知道我要面對的和無得去日本後，佢竟然話將行程順延一年，真係太好了！好感動呀！今日家會就去左青衣，一齊飲完茶就去左trazy的新居，參觀完，大家就好快咁爭住坐張Osim按摩椅，嘻嘻…好舒服呀！！除左ophe，唔知點解佢坐到好似坐緊張電椅咁，奇呀！？我覺得…正正正，如果屋企都有位放張就好了！！

最後12天

好忙碌咁去預備下星期的lunch buffet，估唔到我要合共請44人，勁呀！我識得咁多人？？好彩book得到，差d都無，YMCA竟然話我個booking後就全場full！！好呀…咁星期三就一定會有好多野食啦！嘻…

今天仲係覺得好大壓力，我的濕疹又再出現了…唔制…咁辛苦先好番9成，依家又o黎過！日子一天一天地過，唔捨得的心情不停咁出現，以前好唔鐘意個位，但都真係可以離開又唔捨得。唔通做人就真係咁？

幾晚都訓得唔好，因為真係…發現…身上背負了好大的重擔！大老細唔講背後的原因我知，我可能會好d，但一講完…唉！

好肯定的是我今年十一月的日本之旅…取消！一心想去relax…噢 No…唔使多想！黃太講左，我身負重任，要努力工作，不要多想放假，仲話o黎近的一年都唔好放！聽到咁…更可悲！但唯一可慶幸的是我可以儲到好多假了！！

最後13天

琴晚成六點先出posting，所以大家都未知我調位的事。今日一早，電話響過不停，大家都問我都一樣在問的問題︰"點解會去做objection架？！" 無錯，我一路問問到依家都唔太明，好擔心好驚！因為每個人都走來同我講同一番說話︰"恭喜你呀！但都祝你好運！" 你聽完又咩感覺呢？我聽完就只係好驚好擔心！個位可想而知有幾…棘手呢？？唉…

不其然…不停想…可唔可以唔升呀？真架…我嚇到傻左了！

隔離B組的朋友個個都替我擔心，見到咁樣…我好心酸呀！就算依家大老細都話︰"你過到好要自己小心呀！樣樣事都要多加留意…"聽到佢咁講，當刻感覺覺得…我好似好快去死咁！心就更酸了！好驚呀！！

最後14天

果然出posting了，不過…係今晚成六點先出！好笑的係，全世界都係intranet睇到，唯獨我本人竟然click唔到來看，有無搞錯？！開心的係我唔使再見，但有d怕係仍在26樓，只係去隔離組…唉！有d驚！因為隔離組d人好串好煩，點好呢？！又要努力禱告了！仲要做objection，從來無做過，全新的事，要好勤力先得了！

好快就係新的開始，真正的新的開始，仍是好擔心呀！好驚呀！十幾年未轉過環境，超驚呀！！

Crazy

一個悠長的假期又完左，明天又要返工了！三日紅日加埋兩日大假，一共五日又係咁又過左去，好唔捨得！明天開始，直到年尾都一定肯定再無得放假了。原本諗住去番個旅行，點知又話豬流感，所以行程告吹！超失望！

就係咁…唯有留港消費，但五日的結論係去旅行都可能無用到咁多錢！五一勞動節，去左探姨婆，之後又去shopping，加埋同阿媽去食埋晚飯，嘩…超貴！

到左星期六的佛誕，又係去shopping，約埋trazy同jacyln，係尖沙咀打左個轉，咁都又買到野，死！夜晚就同阿ming一齊食飯，嘩…正日生日竟然係同我地一大班人過呀！晚飯後的指定行程，去shopping加coffee，雖然今次係係尖咀而不是cwb，但行程都係一樣…哈哈！日頭先買左件衫，但夜晚行H&M又買多件，我應該痴左線了，又買野啦！之後，一班自由行的團友一同向星光大道出發，見到間pacific coffee又坐低左。

星期日有d驚有d緊張咁返左教會做司事，點解咁驚？因為對面間維景酒店有豬流感，而且警察叔叔又借用左church的basement用，嘩…好似好大件事咁！驚驚呀…搞到大家早餐都唔去最近間三冠皇，反而去左再遠d間大胃王！食完又去shopping，又買到野？！係呀…死了！買左一對高跟鞋同手袋，雖然話係因為將來要著得好d咁返工，但又好似我買多左了…會唔會我得左個病架！？

你千奇唔好以為我星期日驚完又真係會唔再用錢，我都覺得係唔會囉！對…星期一中午就同daddy mammy去左prince hotel食lunch buffet，之後又去旺角行街街…對！又係旺角間H&M買左兩條裙…天呀！好似放左幾日假，但天天都買到野，你話呀…係唔係用錢多過去個旅行呢？？不過好感恩，岩岩係彌敦道要封路之際，我岩岩上左巴士，唔係又要轉車，好煩架！

到左這刻，我終於覺得安全，因為今天除了落街食早餐，我全日都安全地留在家中，因為我真係認為同相信咁樣對我個銀包同銀行戶口係最好的做法。終於今天係無用過錢呀！嘻…

明天就係最後倒數的十四天，是否真係明天出posting呢？又是否真係十四天後離開呢？好希望明天真係一個好的明天了！

謎

星期一終於有人來替我個位了，咁即係我真係好快就離開。大老細雖然仲未肯講我去邊，但起碼已經正式講左我會係五月尾前走。

唔制呀，我想要十五號前走人呀，唔係以後我都會遲一個月先跳point架！！如果真係要20號先走人，咁我就真係唔抵呀！不如十三號走呀，96年都係5月13日入政府，咁如果09年都係5月13日升都幾好呀！呀…唔制呀！

都有人替我個位囉，咁點解仲唔肯講我係幾時走人呢？日子對於我仲係一個…謎…！？白頭叔叔叫我要預備handover，聽見佢咁講，個心有d不安咁，又有d驚咁，始終未離開過這地方，這個26樓都令我有不少的回憶…開心的、唔開心的、生氣的、憤怒的、甜蜜的…太多了！但始終都要離開了…

其實，離開都原來要勇氣呀…個人真係好不安咁！星期四白頭叔叔同我講要離開了，搞到我個人成晚都訓唔好，連發夢都係我調位的事…好驚呀！我又開始好panic了！

如無意外，兩星期後就真係我的新開始…4號5號我都放假，你估我會唔會係我放假時就出posting呢？還是要星期三我返工時先出呢？又係另一個…謎！